Pakistan Image
مکہ مکرمہ(پاکستان امیج) سعودی عرب میں حج سیکیورٹی فورسز نے حج قوانین کی سنگین خلاف ورزی کرنے والے 3 مصری باشندوں کو گرفتار کر لیا ہے، ان میں ایک اپنے ہی دو ہم وطنوں کو غیر قانونی طور پر مکہ مکرمہ منتقل کرنے کی کوشش کر رہا تھا۔
سعودی خبر رساں ادارے کی رپورٹ کے مطابق گرفتار شخص نے ایک مال بردار گاڑی (Freight Vehicle) میں بنائے گئے خفیہ خانوں میں دو افراد کو چھپا رکھا تھا۔
اس کا مقصد ان افراد کو بغیر کسی ‘حج پرمٹ’ کے مکہ مکرمہ میں داخل کرنا اور وہاں قیام کروانا تھا۔ سیکیورٹی فورسز نے کارروائی کے دوران گاڑی کو روک کر تلاشی لی اور ملزمان کو رنگے ہاتھوں پکڑ لیا۔
رپورٹس کے مطابق تمام ملزمان کے خلاف ضروری قانونی چارہ جوئی مکمل کر لی گئی ہے۔ کیس کو مزید کارروائی اور قانونی سزا کے تعین کے لیے پبلک پراسیکیوشن کے حوالے کر دیا گیا ہے۔
جنرل ڈائریکٹوریٹ آف پبلک سیکیورٹی نے سال 2026 کے حج کے حوالے سے تمام شہریوں اور مقیم غیر ملکیوں پر زور دیا ہے کہ حج کے تمام ضوابط اور گائیڈ لائنز کی سختی سے پابندی کریں۔
حجاج کرام کی سیکیورٹی اور حفاظت کو یقینی بنانے کے لیے متعلقہ اداروں کے ساتھ مکمل تعاون کریں۔ کسی بھی قسم کی خلاف ورزی کرنے والے عناصر کو قانون کے مطابق سخت سزا دی جائے گی۔
