وزیر داخلہ محسن نقوی کی ابوظہبی میں یو اے ای کے نائب وزیر اعظم و وزیر داخلہ لیفٹیننٹ جنرل شیخ سیف بن زید النہیان سے ملاقات

دبئی (پاکستان امیج )وزیر داخلہ محسن نقوی کی ابوظہبی میں یو اے ای کے نائب وزیر اعظم و وزیر داخلہ لیفٹیننٹ جنرل شیخ سیف بن زید النہیان سے ملاقات ہوئی جس میں مختلف امور پر گفتگو ہوئی۔

یو اے ای وزارت داخلہ آمد پر وفاقی وزیر داخلہ محسن نقوی کا پرتپاک استقبال اور گارڈ آف آنر پیش کیا گیا۔ وزیر داخلہ محسن نقوی کا یو اے ای کی وزارت داخلہ کے اعلیٰ حکام سے تعارف کروایا گیا۔ ملاقات میں دونوں دوست ممالک کے درمیان مضبوط تاریخی تعلقات پر تبادلہ خیال کیا گیا اور مختلف شعبوں میں دوطرفہ تعاون کو بڑھانے کے لیے دونوں ممالک کی قیادتوں کی خواہش پر زور دیا گیا۔
ملاقات میں باہمی دلچسپی کے متعدد علاقائی اور بین الاقوامی مسائل ،سیکیورٹی کوآرڈینیشن کو بڑھانے اور مہارت کے تبادلے کے طریقوں پر بات چیت کی گئی، خاص طور پر منشیات اور بین الاقوامی منظم جرائم سے نمٹنے کے شعبوں میں حفاظتی چیلنجوں سے نمٹنے کے لیے مصنوعی ذہانت سے تعاون یافتہ جدید ٹیکنالوجیز کو بروئے کار لانے کی اہمیت پر زور دیا گیا، جو قومی اور علاقائی سطح پر سلامتی اور استحکام کو مستحکم کرنے میں کردار ادا کر رہے ہیں۔
میٹنگ میں میجر جنرل سالم علی الشمسی، اسسٹنٹ انڈر سیکرٹری برائے ریسورسز اینڈ سپورٹ سروسز وزارت داخلہ میجر جنرل شیخ محمد بن تہنون النہیان، ابوظہبی پولیس کے ڈائریکٹر جنرل بریگیڈیئر انجینئر حسین احمد الحارثی، آرٹیفیشل انٹیلی جنس اور ڈیجیٹل سیکیورٹی کے ڈائریکٹر جنرل بریگیڈیئر سعید عبداللہ السویدی، وزارت داخلہ میں انسداد منشیات کے وفاقی محکمے کے ڈائریکٹر جنرل اور پاکستانی وزیر داخلہ کے وفد کے ساتھ متعدد افسران نے شرکت کی-
پاکستانی وفد کے وزارت داخلہ کے دورے کے دوران، اسلامی جمہوریہ پاکستان کے وزیر داخلہ اور انسداد منشیات محسن نقوی کی سربراہی میں وفد کو وزارت کے کسٹمر وزٹ مانیٹرنگ آپریشنز روم اور پولیس سروسز کی نگرانی اور جائزہ لینے کے لیے فراہم کیے جانے والے ذرائع اور نظام، ملازمین کی کارکردگی کو بہتر بنانے، اور پولیس کی خدمات فراہم کرنے کے بارے میں بتایا گیا۔

ملاقات میں دونوں دوست ممالک کے درمیان تاریخی تعلقات پر بات چیت ہوئی اور دونوں وزرائے داخلہ نے مختلف شعبوں میں دوطرفہ تعاون کو فروغ دینے کے عزم کا اعادہ کیا۔ علاقائی صورتحال اور خطے میں پائیدار امن کے حوالے سے بھی بات چیت کی گئی۔اسکے علاوہ، ملاقات میں پاکستانی شہریوں کے لیے ویزا خصوصاً ورک ویزا میں آسانیاں پیدا کرنے کے حوالے سے ضروری اقدامات پر اتفاق رائے کیا گیا۔یو اے ای کے وزیر داخلہ نے اس ضمن میں ہر ممکن تعاون کی یقین دہانی کروائی۔

محسن نقوی نے کہا کہ یو اے ای کے ساتھ برادرانہ تعلقات ہر پاکستانی کے لیے اثاثہ ہے، سیکیورٹی سمیت دوطرفہ تعاون کے ہر شعبے میں تعاون کو مزید وسعت دینا چاہتے ہیں۔انہوں نے کہا کہ پاکستانیوں کی بڑی تعداد یواے ای کی معیشت کی مضبوطی میں کردار ادا کر رہی ہے اور چاہتے ہیں کہ پاکستانی شہری آسانی سے یو اے ای آسکیں، ویزا پالیسی میں آسانی سے شہریوں کو بہت ریلیف ملے گا۔

وزیر داخلہ محسن نقوی نے امن و امان اور جرائم کی روک تھام کے لیے ابوظہبی پولیسنگ کے جدید نظام اور آپریشنز روم کا دورہ کیا۔ وزارت داخلہ کے حکام نے وزیر داخلہ محسن نقوی کو مانیٹرنگ آپریشنز روم کے بارے بریفنگ دی۔وزیر داخلہ محسن نقوی نے پولیس مانیٹرنگ کے جدید ترین نظام میں گہری دلچسپی کا اظہار کرتے ہوئے پولیسنگ سسٹم کو سراہا۔

Please follow and like us:
Pin Share

Check Also

واٹس ایپ کی کور فوٹو سے متعلق فیچر متعارف کرانے کی تیاری!

نیویارک(پاکستان امیج)انسٹنٹ میسجنگ ایپلی کیشن واٹس ایپ نے اپنے صارفین کے لیے ایک نیا اور …

Leave a Reply

Your email address will not be published. Required fields are marked *