نیویارک (پاکستان امیج) امریکہ میں 25 سالہ برطانوی ماڈل بسکٹ کھانے کی وجہ سے ہونے والی الرجی کے باعث ہلاک ہو گئی ہیں، اسے مونگ پھلی سے شدید الرجی تھی اور بسکٹ کھانے کے نتیجے میں اسی الرجی کے سبب اُن کی موت واقع ہو گئی۔
برطانوی میڈیا کے مطابق ماڈل اور رقاصہ اورلا بیگزینڈیل نے امریکہ میں ’لیو سٹیورڈ‘ نامی سٹور سے بسکٹ خریدے جس کے پیکٹ پر یہ درج نہیں تھا کہ اس کے اجزائے ترکیبی میں مونگ پھلی بھی شامل تھی۔برطانوی ماڈل کے خاندان کا کہنا ہے کہ اورلا نے یہ بسکٹ امریکی ریاست کنیکٹیکٹ میں کھائے تھے جہاں وہ ایک ڈانس کمپنی کے تحت ’ایلس اِن دا ونڈرلینڈ‘ کے ایک میوزیکل ورژن پر کام کر رہی تھیں، ان کی بیٹی مونگ پھلی سے ہونے والی الرجی کا ’ہمیشہ خیال رکھتی تھیں‘ اور وہ کبھی اپنے ایپی پین کے بغیر گھر سے باہر نہیں نکلتی تھیں۔
اورلا کو بچانے کے لیے ایپی پین کا استعمال کیا گیا لیکن وہ جانبر نہیں ہو سکیں ،اورلا کا آبائی تعلق لنکاشائر سے ہے لیکن وہ 2018 میں ماڈلنگ میں اپنا کیریئر بنانے کے لیے نیو یارک منتقل ہو گئی تھیں۔اورلا کے خاندان کا کہنا ہے کہ برطانوی ماڈل اپنی ڈانس کمپنی مومکس کے ساتھ ایک بین الاقوامی دورے پر جانے کی تیاری کر رہیں تھیں۔
View this post on Instagram
ادھر لیو سٹیورڈ سٹور کی انتظامیہ جانب سے یہ بھی کہا گیا ہے کہ ان کے پاس موجود بسکٹس میں مونگ پھلی اور انڈا شامل ہے جس کے حوالے سے معلومات پیکٹ پر درج نہیں تھیں، جن افراد کو ان اجزا سے الرجی وہ یہ بسکٹ کھانے سے پرہیز کریں کیونکہ یہ ان کے لیے جان لیوا ثابت ہو سکتا ہے۔
اورلا کے خاندان کے وکیل نے اس بارے میں بات کرتے ہوئے کہا ہے کہ ’ابتدائی تحقیقات سے معلوم ہوا ہے کہ اورلا کی موت بسکٹ فروخت کرنے اور بنانے والوں کی سنگین لاپرواہی کے سبب واقع ہوئی لیکن اب تک اورلا کے خاندان کی جانب سے کسی کے خلاف کوئی مقدمہ درج نہیں کروایا گیا ہے۔
Pakistan Image