کراچی(پاکستان امیج)نارتھ ناظم آباد میں پھل فروش انوکھے طریقے سے لٹ گیااور اسے لیڈی ڈکیت نے اپنے ساتھی کیساتھ مل کر لوٹ لیا۔
تفصیلات کے مطابق تھانہ گلبرگ میں دی گئی درخواست میں پھل فروش نعمت اللہ نے بتایاکہ طاہر ولا چورنگی کے قریب موٹرسائیکل پر آنے والے مرد اور خاتون نے تربوز خریدے جن کی قیمت 680 روپے بنی، مجھ سے پوچھا 5 ہزار کا کھلا ہے،میں نے کہا کھلا مل جائے گا، پیسے کاٹ کر باقی واپس کردیے،اچانک سے انہوں نے کہا تربوز واپس کرو تم مہنگے دے رہے ہو،میں نے ان کے پیسے واپس کرکے تربوز واپس لے لیے۔
متاثرہ پھل فروش کے مطابق جیسے ہی ریڑھی پر کھڑا دوسرا گاہک گیا، یہ موٹرسائیکل پر واپس آگئے، خاتون نے لیڈیز پرس سے اپنا چھپایا ہوا پستول نکالا،مجھ سے دو ریڑھیوں کا کیش جو تقریباً 60 ہزار روپے تھے اور 2 موبائل فون چھین لیے۔ملزمان نے کیش کی صورتحال جاننے کے لیے تربوز خریدا تھا۔
Pakistan Image