لاہور(پاکستان امیج) سابق سیکرٹری الیکشن کمیشن اور وزیر اعلیٰ پنجاب کے مشیر برائے قانون و پارلیمانی امور کنور محمد دلشاد نے الیکشن ملتوی کرنے کی سینیٹ کی قرار داد کے حوالے سے اہم انکشاف کر دیا ۔ کنور دلشاد کا کہنا ہے کہ سینیٹ ایوان بالا ہے،اس میں عام انتخابات 2024 ءکو ملتوی کرنے کے حوالے سے منظور کی جانے والی قرارداد کو کسی صورت نظر انداز نہیں کیا جاسکتا۔ اس کا آئینی اور قانونی تقاضا یہ ہے کہ الیکشن کمیشن آئین کے آرٹیکل 186کے تحت سپریم کورٹ آف پاکستان سے ایوان بالا قرارداد پر رہنمائی حاصل کرے ۔
روزنامہ ’’جنگ‘‘ سے گفتگو کرتے ہوئے کنور محمد دلشاد نے کہا کہ امیدواروں کی درخواستوں پر لگائے گئے اعتراضات پر اپیلوں کے فیصلے اپیلٹ ٹربیونلز کو 10جنوری تک کرنا ہونگے۔ اگر اپیلٹ ٹربیولز بروقت اپیل کا فیصلہ نہ کر سکے تو امیدوار کی اہلیت سے متعلقہ ریٹرننگ افسران کا فیصلہ ہی حتمی تصور کیا جاتا ہے۔ 10جنوری کے بعد ریٹرننگ افسران امیدواروں کی نظر ثانی شدہ فہرست جاری کریں گے۔
Pakistan Image